“Ўзнефтмаҳсулот” компаниясининг расмий сайтида пайшанба куни эълон қилинган мурожаатномада ҳайдовчилар Тошкент ва айрим вилоятларда АЁҚШлар олдида юзага келаётган навбатлардан “хавотирланмаслик”ка чақирилди.

“Муҳтарам ҳамюртлар! Айни кунларда республикамизнинг айрим ҳудудларидаги, шунингдек пойтахтдаги баъзи автомобилларга ёнилғи қуйиш шохобчаларида (АЁҚШларда) автобензинга навбатлар кузатилмоқда”, – деб бошланади “Хавотирга ўрин йўқ!” сарлавҳали мурожаатнома.

Материлда таъкидланишича, бу вазият “Ўзнефтмаҳсулот” билан боғлиқ бўлмаган сабаблар туфайли юзага келган:

Компания тез кунларда бензин нархининг яна оширилиши ҳақидаги гап-сўзларни инкор қилди. Шунингдек, Мустақиллик куни арафасида шохобчаларга етказиладиган бензин ҳажмининг қисқариши ҳақидаги мишмишлар ҳам инкор қилинди: “Байрам арафасида ва ундан кейин АЁҚШларга автобензин белгиланган ҳажмларда ва ҳатто ундан ҳам кўпроқ етказилади”.

Бундай мишмишларнинг тарқалиши туфайли автомобиль ҳайдовчилари олдиндан кўп миқдорда бензин сотиб олишга ҳаракат қилмоқда, бунинг натижасида айрим шохобчаларда ёқилғи етказиш билан боғлиқ муаммолар келиб чиқмоқда. Бундан ташқари, компания бензин захирасини уйда ёки гаражда сақлаш хавфли бўлиши мумкинлигидан огоҳлантирди.

Мурожаатномада вазиятни барқарорлаштириш учун компания нефтни қайта ишлаш заводларида автобензин ишлаб чиқариш миқдорини мумкин қадар кўпайтириш, шу жумладан четдан қўшимча миқдорда углеводород хом ашёсини келтириш ва истеъмолчиларни автобензин билан тегишли миқдорда таъминлаш юзасидан барча зарур чораларни кўраётгани таъкидланди.