Ўта оғир вазн тоифасида иштирок этувчи россиялик боксчи Александр Поветкиннинг навбатдаги рақиби польшалик боксчи Мариуш Вах бўлди. Бу ҳақда “Мир бокса” промоутерлик компанияси матбуот баёнотида маълум қилинди. Боксчилар орасидаги жанг 4 ноябрда Қозондаги “Баскет-Холл” аренасида бўлиб ўтади.

Ушбу бокс кечаси доирасида яна бир россиялик боксчи, биринчи оғир вазн тоифасида Бутунжаҳон бокс уюшмаси талқини бўйича жаҳон чемпиони Денис Лебедев 32 ёшли нигериялик боксчи Латиф Кайоде билан беллашади. Яна бир россиялик боксчи, Халқаро бокс ташкилоти чемпиони камари соҳиби Раҳим Чахкиев британиялик боксчи Олой Афолаби билан муштлашади.   

“Мир бокса” компанияси раҳбари Андрей Рябинскийнинг айтишича, Поветкин дастлаб америкалик боксчи Деонтей Уайлдер билан жанг қилиши режалаштирилган эди, бироқ у билан музокаралар чўзилиб кетгани сабабли оралиқ жанг ўтказишга қарор қилинди.

Поветкиннинг рақиби Вах 2012 йилда Гамбургда Владимир Кличко билан жангдан кейин допинг синовдан ўтганда қонида тақиқланган моддалар борлиги аниқланган. Польяк анаболик воситалар қабул қилганини тан олиб, маълум муддатга боксчилик фаолиятидан четлатилган эди.