Хитой ҳукумати 13 августга ўтар кечаси шарқий соҳилдаги Тяньцзинь порт шаҳрида жойлашган ёнувчи моддалар сақланадиган омборхонада кучли портлаш юз берганидан кейин келиб чиққан ёнғинни ўчириш бўйича ҳаракатлар тўхтатилганини маълум қилди.

Омборхонада ёнғиндан сақлаб қолиш мумкин бўлган мулкнинг аниқ миқдори аниқ эмаслиги туфайли шундай қарор қабул қилинган.

Қайд этилишича, ёнғин ўчоғи бартараф этилган. Ушбу омборхона тегишли бўлган компания раҳбари ҳибсга олинган.

Охирги маълумотларга кўра, ушбу ҳодиса натижасида 42 кишининг ўлими тасдиқланган. Шунингдек, ўнлаб ўт ўчирувчилар бедарак йўқолган, деб ҳисобланмоқда.

Портлаш кучли бўлганидан яқин-атрофдаги баъзи турар-жон биноларининг ойнаси синиб, эшиклар илмоғидан чиқиб кетган. Маҳаллий аҳоли портлашдан кейин ер қимирлаганини ҳис қилган

Гувоҳларнинг айтишича, портлаш оқибатида катта оловли шар ҳосил бўлган. Бунга омборхонада сақланган зарарли моддалар сабаб бўлган бўлиши мумкинлиги айтилмоқда.

Портлаган бино ёнидаги автомобиллар ёниб кетган.