Ҳаётдан кўз юмганларни хотирлашга бағишланган анъанавий "о-бон" куни муносабати билан жорий этилган ёзги таътилнинг биринчи кунида 45 километрга чўзилган тирбандликлар вужудга келди, дейилади мамлакат йўл ҳаракати ахборот маркази хабарида.

"О-бон" куни муносабати билан ўзларининг қадрдон қишлоқлари ва оилавий қабристонларига оммавий қайтаётган японияликлар сабабли йирик шаҳарларга элтувчи йўлларда тирбандликлар пайдо бўлган. Сайтама префектурасидаги "Канъэцу" тезюрар йўлида 45 километрлик тирбандлик келиб чиққан бўлса, Япония шимоли-шарқидаги “Тохоку” автомагистралида 35, жанубий Кюсю оролида ҳам 35 километрлик автоқаторлар вужудга келган.

Япон темир йўллар компанияларининг маълум қилишича, "Шинкансэн" тезюрар поездлари учун чипталар чоршанба куни тўлиқ сотиб юборилган. Айни вақтда, авиакомпанияларда ҳам чипталар қолмаган. Бироқ бугун самолётларда бўш ўринлар пайдо бўлган.
Шанба-якшанба куни одамларнинг таътил тугаб, ортга қайтиши навбатдаги тирбандликларни келтириб чиқариши айтилмоқда.