Калифорния университети тадқиқотчиси Брендон Беллинжер машҳур “Тахтлар ўйини” сериалининг қисмларидан бирини томошабинларга қўйиб бериб, Apple Watch учун ўзи яратган махсус илова ёрдамида уларнинг юрак мускуллари қисқаришини текширди. Аниқланишича, жанг саҳнаси чоғида юрак айниқса тез уради.
The Wall Street Journal нашрининг ёзишича, Cardiogram иловаси юрак уришидаги ўзгаришларни атрофда содир бўлаётган воқеалар билан қиёслайди. Тажриба давомида Беллинжер 10 нафар кўнгиллига бешинчи мавсумнинг саккизинчи қисмини қўйиб берган. Ушбу қисмда бир қатор қаҳрамонлар фожиали ҳалок бўлади, шунингдек, сюжет билан боғлиқ айрим сирлар очилади.
Синовдагилар қисмни кўришни бошлаганларида уларнинг юраги дақиқасига 84 марта ураётган эди. Бу уларнинг телевизор қаршисига келганига қадар ҳаракатланганлигидандир, кейинроқ эркакларнинг юраги дақиқасига 72 марта, аёлларнинг юраги эса 76 марта ура бошлаган.
Экранда ҳарбий тўқнашувлар тасвирланган ёки ҳаяжонли вазият юзага келганида юрак уриши дақиқасига 92 мартага етган.