Тайваннинг смартфон ишлаб чиқарувчи HTC компанияси персонла миқдорини 15 фоизга қисқартириш режасини ошкор қилди. Бу билан харажатлар 30 фоизга қисқариши айтилмоқда.
2015 йил март ҳолатига кўра компания ходимлари сони 15 685 кишини ташкил этиб турган эди. Йил охирига қадар улардан 2 300 нафари ишсиз қолади.
Бундан ташқари, компания операцион харажатларни 35 фоизга қисқартириб, реструктуризация ўтказмоқчи, унинг доирасида премиал смартфонлар, виртуал реаллик қурилмалари ва портатив электроникага ихтисослашган янги бўлинмалар ташкил этилади.
Директорлар кенгаши раиси ва бош директор Шер Воннинг сўзларига қараганда, HTC бизнесини кенгайтириб, смартфонлар бозоридан ташқарида ҳам катта фойда кўрмоқчи.
Компаниянинг молиявий муаммолари Хитойда смартфонларнинг сотилиш ҳажми қисқариши, айниқса, HTC One M9 аппаратига бўлган талабнинг кутилган даражада эмаслиги билан боғлиқ.