Хитойнинг Xiaomi компанияси ишлаб чиқарган янги Redmi Note 2 смартфонининг нархи 125 долларни ташкил қилади. Таъкидланишича, унинг техник тавсифлари HTC’нинг охирги моделдаги, нархи тўрт баробар қиммат бўлган смартфонлари билан бемалол баҳслаша олади.

Аппарат 1080р ечимли 5.5 дюймли экранга, 13 Мп ли асосий ва 5 Мп ли фронтал камерага эга. Смартфоннинг юрагини 8 ядроли Helio X10 процессорига эга MediaTek чипсети ташкил этади. Худди шунақа чипсет HTC’нинг M9+ смартфонига ўрнатилган.
Redmi Note 2ни сотиб олганлар бонус тариқасида инфрақизил узаткичга эга бўлади. Унинг ёрдамида IK-пультларни қўллаб-қувватлайдиган ҳар қандай уй техникасини бошқариш мумкин бўлади.

Смартфон 2 Гб ли LPDDR3 оператив хотираси, 3060 mAh қувватли батареяси, microSIM-карталар учун иккита слот, 16 ёки 32 Гб ли ўз хотираси билан таъминланган.
Хитойда смартфон 16 август куни сотувга чиқарилади. Кичик модель (процессор частотаси 2 ГГц, хотира ҳажми 16 Гб) 125 доллардан 140 долларгача, Prime номли катта модель (процессор частотаси 2.2 ГГц, хотира ҳажми 32 Гб) 160 доллар туради.