АҚШ Давлат департаменти Марказий Африка Республикасида тинчликпарвар контингет вакиллари томонидан жинсий зўравонликнинг амалга оширилганидан қаттиқ норозилигини билдирди.
“АҚШ МАРда вазиятни барқарорлаштириш бўйича БМТ кўп истхисосли комплекс миссияси тинчликпарвар кучлари вакиллари томонидан ушбу мамлакатда содир этилган ишлардан таажжубда ва қаттиқ норозилигини билдиради”, – дейилади департаментнинг расмий вакили Марк Тонер ўқиб эшиттирган баёнотда.
Бундан ташқари, Тонер БМТ бош котиби Пан Ги Муннинг бу борада кўрган чора-тадбирлари, хусусан, Хавфсизлик Кенгашининг ёпиқ мажлисини ўтказганини қўллаб-қувватлашини маълум қилди. Бош котиб бундай жиноятларни халқаро ташкилот организмидаги “саратон ўсимтаси” деб атади. Чоршанба куни у миссия раҳбари Бабакар Гайни истеъфога чиқарди, аммо жазо чоралари сенегаллик генерал билангина чекланиб қолмаслигини таъкидлади.
Жанжал август ойининг бошида бошланди. Ўшанда ҳуқуқ ҳимоячилари БМТ ҳарбийлари томонидан пойтахт Бангида 12 яшар қизнинг зўрланганини маълум қилган эди. Бироздан сўнг улар томонидан Бангида ўтказилаётган операция чоғида 16 ёшли бола отаси билан бирга ўлдирилди. Ушбу операцияда Камерун ва Руанда контингенти иштирок этган эди.
Болаларга жинсий зўравонлик қилишда Франция контингенти ҳам айбланмоқда.