Германия ҳукумати яқин ойларда бундесвернинг (ҳарбий кучлар) Туркия жанубидаги миссиясини якунлаб, Сурия чегарасида жойлаштирилган зенит-ракета комплексларини олиб кетади. Бу ҳақда ГФР мудофаа вазирлиги вакили баёнот берди.
Бу ҳақдаги маълумот ўтган шанба Spiegel online нашрида чиққан эди. Мудофаа вазирлиги вакили ушбу ахборотни тасдиқлади.

Германия ҳарбий хизматчиларининг миссияда иштирок этишга мандати кейинги йилнинг январида тугайди. Келишувга кўра, муддат тугагач, Германия Туркияга яна 400 аскар юбориши мумкин. Аммо ҳукумат мандатни узайтирмасликка қарор қилди. Бугун вазирлар маҳкамаси бундестагни ўз режаларидан бохабар қилиши кутилмоқда.

Айни пайтда Туркияда Германиянинг 260 нафар ҳарбий хизматчиси бор. Германия ҳарбийларининг фикрича, Сурия томондан Туркияга ҳужум уюштирилиш хавфи айни пайтда йўқ, шу боис миссияни давом эттиришдан маъни қолмади.