АҚШ президенти Барак Обама интернет фойдаланувчилар билан куннинг кундузги ва кечки қисмида эшитишни хуш кўрадиган қўшиқлари билан ўртоқлашди. Обама кундузги ва кечки пайт учун турли қўшиқлардан тузилган иккита плейлистни яратиб, уларни Spotify мусиқа сайтида жойлаштирди. Обама умумий ҳисобда 40 та қўшиқ – ҳар бир плейлист учун 20 та дан қўшиқ танлаб олди.  

Обама муайян бир мусиқа йўналишига устунлик бермаслиги маълум бўлди. У тузган плейлистда хип-хоп мусиқачиларнинг қўшиқлари билан бирга жаз ва R&B йўналишидаги қўшиқларни ҳам учратиш мумкин. Бироқ Обама кундузи жўшқин ва турли йўналишлардаги мусиқани тинглашни хуш кўрса, кечаси асосан жаз ва соул йўналишидаги мусиқаларни тинглашни хуш кўрар экан.

АҚШ президенти кундузи Жастин Тимберлейк (Pusher Love Girl), Боб Марли (So Much Trouble in the World) ва Ролинг Стоунс (Gimme Shelter)ни эшитса, кечаси Бейонсе (Superpower),  Жон Колтрэйн (My Favorite Things) ва Фрэнк Синатранинг (The Best is Yet to Come) қўшиқлари остида уйқуга кетишни маъқул кўрар экан.

Оқ уй вакилларининг Spotify мусиқа сайтида аккаунт очишлари ҳукумат вакилларининг ижтимоий тармоқлардаги фаолиятларидаги янги қадам бўлди. Обама ва Оқ уй расмий вакиллари твиттер ва фейсбук орқали турли эълонлар қилиб турадилар.