Ўзбекистон Республикаси Меҳнат ва аҳолини ижтимоий муҳофаза қилиш вазирлиги томонидан Ногиронлар ҳуқуқлари тўғрисидаги Конвенцияни ратификация қилишга босқичма-босқич тайёргарлик кўриш чораларини амалга ошириш мақсадида 7та қонун лойиҳасини ишлаб чиқиш режалаштирилган. Бу ҳақда вазирлик биносида бўлиб ўтган Ўзбекистон Республикаси Меҳнат ва аҳолини ижтимоий муҳофаза қилиш вазирлиги ҳамда ногиронлар жамоат ташкилотлари ўртасидаги консультатив учрашув вақтида маълум қилинди.

Жумладан, Аҳолини ижтимоий муҳофаза қилиш чора-тадбирлари мониторинги ва таҳлили бошқармаси бошлиғи Баходир Шарапов вазирлик томонидан “Ногиронлар ҳуқуқлари тўғрисида”ги, “Ногиронларнинг ижтимоий интеграцияси тўғрисида”ги, “Ижтимоий хизмат ва шахсий ёрдамчилар тўғрисида”ги, “Ногиронлар учун иш ўринларини ташкил этиш тўғрисида”ги, “Ногиронларнинг бепул юридик хизматдан фойдаланиш ҳуқуқи тўғрисида”ги, “Ногиронларнинг таълим олиш ҳуқуқи тўғрисида”ги қонун лойиҳалари ишлаб чиқилиши режалаштирилаётганини таъкидлаб ўтди.