Юқори тезкорликка эга Afrosiyob поезди 15 августдан бошлаб кунига 3 марта йўлга чиқади. “Ўзтемирйўлйўловчи” АЖнинг хабар беришича, бундай қарор туристик мавсумнинг бошланиши муносабати билан қабул қилинган.

“15 августдан 764/763 рақамли Самарқанд-Тошкент-Самарқанд йўналишли Afrosiyob поезди ҳар куни юради. Самарқанддан поезд соат 10:40да йўлга чиқиб, Тошкентга 12:57да етиб келади, шунингдек, Тошкентдан 13:50да йўлга чиқиб, Самарқандга 15:58да етиб боради”, – дейилади компания хабарномасида.

Айни кунларда Ўзбекистонда “Шарқ тароналари” халқаро фестивалига тайёргарлик якуний босқичида. Тадбир 25-30 август кунлари Самарқандда бўлиб ўтади.