АҚШ президенти лавозимига номзод Ҳиллари Клинтон президент лавозими учун сайловолди пойгасидаги рақиби Жеб Бушнинг “ИШИД” террорчилик гуруҳининг пайдо бўлишида жавобгарликнинг бир қисмини Клинтоннинг зиммасига қўйган айбловини инкор этди, деб хабар бермоқда Reuters ахборот агентлиги.

Айова штатида Клинтон нутқ сўзлаётиб, Ироқдаги вазиятнинг кескинлашиши президент Кичик Жорж Буш маъмуриятининг ҳаракатлари туфайли вужудга келганини айтди. Шу билан бирга у Жеб Буш акасининг ҳаракатларини ҳимоя қилишга ва бўлиб ўтган воқеанинг тўлиқ суратини беркитишга уринаётганига эътиборни қаратди.

Клинтоннинг айтишича, Жорж Буш ўша пайтдаги Ироқ ҳукумати билан 2011 йилнинг охиригача АҚШ қўшинларининг мамлакатдан олиб чиқиб кетилиши бўйича келишув тузган. Айнан шу ҳолат “ИШИД”нинг минтақада кучайишига сабаб бўлган.

Аввалроқ республикачи Жеб Буш Барак Обаманинг нотўғри ҳаракатлари Ироқдаги вазиятнинг беқарорлашуви ва “ИШИД”нинг кучайишига олиб келганини айтиб, Ҳиллари Клинтон ўша пайтда АҚШ Давлат котиби лавозимини эгаллаганини таъкидлаб ўтди.