Жанубий Кореянинг сув остига ғарқ бўлган “Севоль” паромини чиқариб олишда ёрдам бериш учун воқеа жойига Хитойнинг иккита кемаси юборилди, деб хабар беради Рёнхап агентлиги.
“Севоль” 2014 йилнинг 16 апрель куни Чиндо ороли яқинида чўкиб кетган эди. Унинг бортидаги 300дан ортиқ одам ҳалок бўлган эди. Жорий йилнинг апрелида Корея Хитой компаниялари консорциуми билан паром корпусини сув остидан чиқариб олиш бўйича 72.5 млн долларлик шартнома имзолаган эди.
Хитойнинг 12 минг тонна сиғимли “Дали” кранли кемаси ҳамда 450 тонна сиғимли “Хуахэ” буксири айни пайтда Чиндо ороли яқинида турибди. Кема бортидаги 150 киши кейинги икки ой мобайнида керакли ахборотни тўплаб боради, шунингдек, ҳалок бўлганларнинг таналарини оқим олиб кетмаслиги учун атрофни тўр билан ўрайди.
Паром бортида асосан 15-19 ёшдаги мактаб ўқувчилари бор эди. Улардан 9 нафари ҳалигача дом-дараксиз йўқолган деб ҳисобланмоқда. Паром Чеджудо курорт оролига кетаётганда ҳалокатга учраган эди.