“Челси” шифокори Ева Карнейро жамоа бош мураббийи Жозе Моуринью билан чиққан можаро ортида асосий жамоадан четлатилган бир пайт унинг собиқ қаллиғи Руперт Паттерсон Еванинг жамоа футболчиларидан бири билан ишқий муносабатда бўлганини маълум қилди. 

Йигитнинг қайд этишича, бу ҳақда унга Карнейронинг ўзи айтган ва шу сабабли улар айрилишган.

“У бу ҳаракати билан менга азоб бермоқчи бўлган. Ева меҳмонхона хонасида футболчи ошиғи билан учрашганини ўзи тан олди”, деб айтди Паттерсон The Sun нашрига.

Йигит унинг эндиликда собиқ маъшуқаси доим бой эркакларни яхши кўргани ва у каби йилига 30 минг фунт оладиган оддий лондонлик тижорат директори футболчилар каби катта пул ишлай олмаслигини, улардан баъзилари у бир йилда топадиган пулни бир кунда топишлари ва у бунга қарши ҳеч нарса қилолмаслигини таъкидлаб ўтган.   

Паттерсон Ева айнан ким билан ишқий муносабатда бўлганини ошкор этмаган.

Аёл шифокорнинг мухлислари Ева можаролар туфайли “Челси”ни тарк этиши мумкинлигидан хавотирланишмоқда. Фанатлар инглиз жамоалари шифокорлари орасидаги энг жозибали шифокор истеъфога кетишини тасаввур ҳам қилиша олмаяпти.

Бу орада “Арсенал” мухлислари “канонирлар” раҳбариятидан Евани ишга олишни талаб қилишмоқда.

Эслатиб ўтамиз, “Челси” бош мураббийи Жозе Моуринью Ева Карнейрони “Суонси”га қарши учрашувдан кейин дарҳол асосий жамоадаги ишдан четлаштирган. Ўша учрашувда Ева ўйиннинг охирги дақиқаларида тиббий ёрдамга муҳтож бўлган Эден Азарга ёрдам бергани мураббий билан келишмаган ҳолда майдонга чиққан. Бу ҳолат рақибга вақтни чўзишга ёрдам берган ва мураббийнинг ғазабини келтирган. Маълумотларга кўра, Моуринью Карнейрога нисбатан ҳақоратли сўзлар ишлатган.

Бироқ кейинроқ португалиялик мутахассис ўз айбини тан олиб, “ўйинчининг соғлиғи исталган натижадан муҳимроқ эканини” айтган.