Sony корпорацияси “Юлдузлар жанги” фильми услубида ишланган, чегараланган миқдорда чиқариладиган PlayStation 4 ўйин приставкалари сериясининг чиқарилишини эълон қилди. Бу ҳақда Bloomberg агентлиги маълум қилди.
“Юлдузлар жанги” фильмидаги бош ёвуз қаҳрамон Дарт Вейдер сурати туширилган приставканинг тақдимоти АҚШнинг Анахайм шаҳрида ўтказилган Disney Expo халқаро кўргазмасида бўлиб ўтди. PS 4 Darth Vader Edition приставкаси 17 ноябрь куни Electronic Arts компаниясининг “Star Wars: Battlefront” отишмачоқ ўйини билан бирга сотувга чиқарилади. Яқин орада приставкага буюртма олиш бошланади.
Маълумотларга кўра, PlayStation 4 ўйин приставкаси июлда дунёдаги энг бозори чаққон приставка бўлди.
“Юлдузлар жанги” фильмининг 7-қисми – “Юлдузлар жанги: кучнинг уйғониши” фильми жорий йилнинг 18 декабридан экранларга чиқарилиши режалаштирилган.