Европа хавфсизлик ва ҳамкорлик ташкилоти (ЕХҲТ) Қирғизистонга жиноий йўл билан топилган пулларни ювиш ва террорчиликни молиялаштириш билан курашишда ёрдам беради. Бу ҳақда ЕХҲТнинг Бишкекдаги маркази раҳбари Жон МакГрегор Жиноий даромадларини қонунийлаштиришга қарши курашиш ва террорчиликни молиялаштириш бўйича Евроосиё гуруҳи экспертлари учрашувида айтиб ўтди.

МакГрегорнинг айтишича, бунинг учун Қирғизистонда тегишли қонун лойиҳалари қабул қилинишига эришиш керак.
“Бундай хавфларга қарши курашиш барча манфаатдор шахсларнинг сайъ-ҳаракатлари бирлашишини талаб қилади. Ёлғиз ҳолда бу билан дунёнинг бирорта давлати кураша олмайди”, деб айтди МакГрегор.

Қирғизистонда ЕХҲТнинг Бишкекдаги маркази кўмаги остида ўтказилган Евроосиё гуруҳига аъзо давлатлар экспертларининг учрашувида Ўзбекистон, Беларус, Ҳиндистон, Қозоғистон, Қирғизистон, Хитой, Россия, Тожикистон ва Туркманистон молиявий разведка хизмати вакиллари иштирок этдилар.