“Ўзбекистон ҳаво йўллари” Миллий авиакомпанияси 2019 йил сўнгига қадар Тошкент шаҳридаги халқаро аэропортда янги йўловчи терминали (Тошкент-4)ни ишга туширишини маълум қилди.

Компания пресс-релизида келтирилишича, янги терминал Жанубий Корея билан ҳамкорликда бунёд этилади ва Ўрта Осиёдаги энг замонавийси бўлади.

“Ўзбекистон ҳаво йўллари” Миллий авиакомпанияси бош директори Валерий Тяннинг қайд этишича, мазкур лойиҳа ташаббускори Ўзбекистон Республикаси Президенти Ислом Каримов бўлиб, янги терминални ишга тушириш бўйича аниқ муддатларни белгилаб берди.

Ислом Каримов, шунингдек, янги терминал дунёнинг энг яхши стандартларига мос келиши ва 30-50 йил хизмат кўрсатиш истиқболига эга бўлиш вазифасини қўйган. Тяннинг сўзларига кўра, бу кенг кўламли лойиҳа бўлгани боис уни амалга оширишга Ўзбекистоннинг 10дан зиёд муассасаси жалб этилган.

Эслатиб ўтамиз, Корея халқаро ҳамкорлик агентлиги (KOICA) янги Тошкент-4 йўловчи терминалини қуришдаги техник-молиявий асосларни ишлаб чиқиш борасида дастлабки изланишларни ўтказиш учун Ўзбекистонга ўз мутахассисларини юборган эди.

KOICA маълумотларига кўра, Ўзбекистон ва Жанубий Корея лойиҳа бўйича ҳукуматларо келишувни 2015 йилнинг сентябрь ойида имзолайди. Шундан сўнг лойиҳанинг техник-молиявий асосларини ишлаб чиқиш учун ижрочилар тайинланиб, келгуси йил аввалидан техник-молиявий асосларни ишлаб чиқишга старт берилади.