“UZAUTO-INZI” масъулияти чекланган жамияти қўшма корхонаси йилига 2,4 минг тонна алюмин қуймаси ҳажмида автомобиллар, двигателлар ва генераторлар учун 43 номдаги эҳтиёт қисмларни ишлаб чиқаради.

Тизимда автомобиллар учун алюмин эҳтиёт қисмлар ишлаб чиқарувчи янги қўшма корхона очилгани тўғрисида “Ўзавтосаноат” АК пресс-релизида хабар қилинди.

Бундан аввалроқ эса “Ўзавтосаноат” АК ва Жанубий Кореянинг “INZI AMT Co., Ltd.” компанияси ўртасида алюмин деталларни босим остида юқори аниқликда қуйиш усулида ишлаб чиқиш бўйича лойиҳани амалга оширишга келишиб олинган эди. Шу мақсадда тенг шерикликка асосланган, устав капитали 10 млн доллардан иборат масъулияти чекланган жамият кўринишидаги “UZAUTO-INZI” қўшма корхонаси ташкил этилди.

Маҳсулот ишлаб чиқариш 2017 йилнинг 1 январидан бошлаш белгиланган. Қурилиш ишларини олиб бориш учун “UZAUTO-INZI” МЧЖ ҚКга 6,9 га, жумладан, “General Motors Powertrain Uzbekistan” АЖнинг фойдаланилмаётган ҳудудидан 5,3 га майдон ажратиб берилди.