Android операцион тизимининг кейинги версияси Marshmallow (Зефир) номини олади. Бу ҳақда Android Developers’нинг расмий сайтида маълум қилинди.

Янги операцион тизим 6.0 рақами билан белгиланади. Google операцион тизимнинг номини эълон қилиш билан бирга Android 6.0 SDK дастурчилари учун инструментарийни тақдим қилди ва 23-версиядаги API’ни эълон қилди. Операцион тизим қачон чиқарилиши маълум қилинмади. 

Google компанияси Android операцион тизимининг версияларини 1.5 Cupcake (Кекс) версиясидан бошлаб алифбо тартибида келувчи ширинликлар билан номлайди. Операцион тизимнинг биринчи икки версияси Astroboy ва Bender роботлари номи билан аталган, бироқ ушбу номлар учун муаллифлик ҳуқуқларининг бузилиши туфайли қайта номланган эди. Бугунги кунда операцион тизимнинг энг долзарб бўлган 5.x версияси Lollipop (Чўпли конфет) деб номланади.