Москвада 40 ёшли ўзбек тадбиркорининг Hyundai Solaris русумли автомобилидан 5 миллион рубль миқдордаги пулини ўғирлаб кетишди. Москва полициясининг маълумотига кўра, жабрдийда бу пулни автомобиль сотиб олиш учун олиб келган.

“Номаълум шахслар ВАЗ-2114 автомашинасида Hyundai Solaris билан кичик йўл ҳаракати ҳодисасини уюштирган. Сўнгра “Лада”даги уч эркак тушиб келган ва автомобилнинг олд ойнасини синдириб, тўппонча билан ҳайдовчига таҳдид солган ҳолда ҳайдовчидан 5 млн рубль солинган сумкани тортиб олиб, воқеа жойидан яширинишган”, дейилади Москва полицияси пресс-релизида.

Босқинчилик ҳаракати юзасидан жиноят иши очилган бўлиб, жиноятчилар шахсини аниқлаш ва уларни қўлга олиш бўйича чоралар кўрилмоқда.