Украина ташқи ишлар вазирлиги Москвадан РФ раҳбарияти нима сабабдан халқаро ҳуқуқ ва Украина қонунчилигини бузаётганини тушунтириб беришни талаб қилди. Бу ҳақда вазирлик матбуот хизмати хабар берди.

ТИВ Россия президенти Владимир Путиннинг Қрим ярим оролига ташриф буюришига қарши норозилигини билдириб, бу борадаги нотасини Россиянинг ташқи сиёсий идорасига йўллади.

“Қрим мухтор республикаси ва Севастополь бутун маданиятли дунё учун Украинанинг бир қисми бўлиб қолмоқда... Россиянинг биринчи даражали шахслари томонидан намойишкорона тарзда халқаро ҳуқуқ ва Украина қонунчилигининг асосий принциплари очиқ-ойдин бузилаётгани норозиликлар келтириб чиқармоқда. Шунга қарамай, Россия томонининг диққатини яна бир марта Украинанинг вақтинчалик эгаллаб олинган ҳудудига киришда барча расмий қоидаларга риоя этиш зарурлигига қаратамиз”, – дейилади баёнотда.

Эслатиб ўтамиз, 17 август куни Путин Қримга ташриф буюриб, туризм масаласига бағишланган мажлисда иштирок этди.

Қрим ярим оролини 2014 йилнинг март ойида Россия ўз ҳудудига қўшиб олган бўлиб, бу жаҳон ҳамжамиятининг кескин норозилигига сабаб бўлиб келмоқда. Қримнинг қўшиб олиниши, шунингдек, Украина шарқидаги вазият АҚШ ва ЕИ давлатлари томонидан Россияга нисбатан иқтисодий ва сиёсий чекловларнинг амалга киритилишига сабаб бўлди.