АҚШ Давлат департаменти матбуот хизмати бошлиғи Жон Кирбининг маълум қилишича, Қўшма Штатлар Башар Асаднинг Сурия раҳбарлигидан кетиши керак, деб ҳисоблайди. ТАСС нашрида ёзилишича, АҚШ Сурияда ҳукумат бошқа сиёсий кучлар қўлига ўтишини хоҳлайди.

"АҚШдагилар бу борада ён беришни режалаштирмаган. Бизнинг Башар Асад бўйича қарашларимиз ўзгармайди. У Суриянинг келажагида бўлмаслиги керак", дейди Кирби.

Унинг қайд этишича, АҚШ давлат котиби Жон Керри бироз олдинроқ, Россия ТИВ раҳбари Сергей Лавров ҳамда Саудия Арабистони ТИВ раҳбари Одил ал-Жубайр билан учрашуви чоғида Суриядаги сиёсий танглик ҳолатини муҳокама қилган. Шунингдек, Жон Керри Башар Асаднинг кетиши кераклиги ҳақида ўз ҳамкасблари билан телефон орқали мулоқотлари чоғида ҳам қайта-қайта такрорлаган.