Бразилиянинг энг йирик нефть компанияси Petrobras’га компания топ-менежерларининг коррупцион можародаги иштироки учун АҚШда рекорд даражадаги жарима солиниши хавф солмоқда. Бу ҳақда Reuters маълум қилган. 

Агентликнинг маълумотларига кўра, томонлар ҳали музокаралар бошламади, шунинг учун тафтиш 2-3 йилга чўзилиши мумкин. Бразилия компанияси Нью-Йорк фонд биржасида савдо қилгани боис у АҚШ юрисдикциясига тушмоқда.

Манбаларнинг таъкидлашича, ҳозирги товон пули бўйича баҳолашлар дастлабки баҳолашлар бўлиб, бироқ бунгача коррупцион фаолият учун солинган максимал жарима қийматидан икки марта кўпроқни ташкил қилмоқда. 2008 йилда Германиянинг Siemens компаниясига 800 млн доллар жарима солинган эди, шу билан бирга компания шундай миқдордаги жаримани Германия ҳукуматига ҳам тўлаб берган.

Petrobras’нинг коррупцион можаросида компаниянинг топ-менежерлари, унинг пудратчилари ҳамда Бразилиянинг етакчи сиёсатчилари аралашган. Ушбу можаро ҳаттоки Бразилиянинг амалдаги президенти Дилма Русефгача бориб тақалмоқда, бироқ у бу айбловларни инкор этмоқда.

Аввалроқ Бразилияда мамлакатдаги энг йирик коррупцион схемани ташкил қилишда гумон қилиниб, мамлакатнинг собиқ президенти Луис Инасиу Лула да Силванинг бош маслаҳатчиси Жозе Дирсеу ҳибсга олинган эди. Дирсеу Petrobras давлат нефть-газ компаниясининг фаолиятидан ноқонуний даромад олиш жиноий схемасини яратганликда гумон қилинмоқда. Тергов маълумотларига кўра, жиноятчилар компанияга 2 млрд доллар зиён етказишган.