Полиция ходимлари Россиянинг Чита шаҳрида ичиб олиб, бронетранспортёрда шаҳар айланган икки аскарни қўлга олди.

“Шаҳар бўйлаб БТР юргани ҳақида кеча тунда хабардор бўлдик. Гувоҳларнинг айтишича, бронетранспортёр катта йўлнинг қарама-қарши қисмида авария ҳолатини вужудга келтирган ҳолда ҳаракатланган. Воқеага ойдинлик киритиш учун махсус экипаж юборилган”, – дея маълум қилган Байкалорти ўлкаси ИИБ матбуот хизмати раҳбари Лариса Иванова.

Полициячилар турар-жой биноси олдида турган БТРни қўлга олишган, бироқ машина ичидагилар ташқарига чиқишдан бош тортишган. Инспекторлар БТР ойнасини синдириб, ичкаридаги ҳарбий либосда бўлган икки маст эркакни олиб чиққан.

“БТР бошқаришга ижозатномаси бўлган ҳайдовчига нисбатан маст ҳолда рул бошқарганлик учун далолатнома тузилди. Қўлга олинган ҳайдовчи ва йўловчи ҳарбий комендатурага топширилган. Текширув хулосалари процессуал қарор чиқариш учун ҳарбий прокуратурага жўнатилган”, – дея қўшимча қилди Иванова.