Американинг Bank of America Merrill Lynch инвестицион банки Россия рубли курсининг 2015 йил охирига бориб 60 руб/доллар курсидан ҳам ёмонлашишини башорат қилди. Бу ҳақда Bloomberg агентлиги хабар тарқатмоқда.

Банк нефть нархининг келгуси уч йилдаги кўрсаткичи бўйича ҳам ўз башоратларини билдириб ўтган ва бунинг натижасида рублнинг 1 долларга нисбатан кўрсаткичи 61 рублни ташкил қилишини таъкидлаган.

Бунга нефтнинг жаҳон бозоридаги арзонлашиши давом этиши сабаб сифатида кўрсатилмоқда. АҚШнинг тижорат нефть захираси 10-14 август оралиғида 2,62 млн. баррелга ошиб 456,2 млн. баррелни ташкил қилмоқда.

Бунинг натижасида Брент нефть маркасининг нархи октябрь ойига бориб 0,45 фоизга арзонлашиб, бир баррель нефть нархи 46,95 долларга тушиши башорат қилинмоқда.

Bloomberg таҳлилчиларига кўра, 2015 йилнинг тўртинчи чорагида Россия валютасининг долларга нисбатан курси 63,33 рубль атрофида бўлади.