Жанубий Корея ҳарбийлари КХДР томонидан ўз ҳудудидаги радиокарнайларнинг ўққа тутилишига жавобан артиллериядан ўт очди. Бу ҳақда «Ренхап» агентлиги хабар берди.

Қайд этилишича, Жанубий Корея шимолликлар томонига бир неча ўнлаб ракеталар учирган.

Шимолликлар бугун эрталаб Жанубий Кореянинг Кёнгидо вилоятидаги Йончхон уездидаги радиокарнайларни ўққа тутишган.

Бироз олдинроқ, Жанубий Кореяда КХДР томонидан радиокарнайлар ўққа тутилиши бўйича миллий хавфсизлик кенгаши чақирилгани хабар қилинганди.

Ўтган ҳафтада Шимолий Корея томони чегара ҳудудида жанубликларнинг ташвиқотларида фойдаланилаётган радиокарнайларини йўқ қилмоқчилиги ҳақида огоҳлантирганди.

Қайд этилишича, ўтган ҳафтада чегарада Жанубий Корея аскари жароҳатланганидан кейин жанубликлар 11 йилдан бери илк марта радиокарнайлар орқали Пхеньян сиёсатини танқид қилувчи чиқишлар уюштирганди.

КХДР ҳукуматининг билдиришича, бундай трансляцияларнинг жорий қилиниши уруш очиш билан тенг ҳисобланади.