Жанубий Кореянинг ICT Technologies компанияси Миллий географик ахборот тизимини ишга туширади. Бу ҳақда 19 август куни Тошкент шаҳрида Ўзбекистон Республикаси Ер ресурслари, геодезия, картография ва давлат кадастри давлат қўмитаси томонидан ўтказилган матбуот анжуманида қўмита раисининг биринчи ўринбосари Тўлқин Абдуллаев маълум қилди.

Унинг таъкидлашича, Ўзбекистон Республикаси Миллий географик ахборот тизими “Электрон ҳукумат”нинг бир қисми сифатида ташкил этилади ва сунъий йўлдош геодезик тармоқлари, компьютерлаштирилган давлат кадастрлари ягона тизими ва бинолар ва иншоотларнинг ягона давлат ҳисоби тизимларини ташкил этиш режалаштирилмоқда.

Лойиҳанинг молиявий қиймати 25 млн долларни ташкил этиб, Жанубий Корея Эксимбанкининг 15 млн долларлик заёмлари ҳисобига амалга оширилади. Заёмлар 40 йилга тақдим этилган бўлиб, унинг ўн йили имтиёзли муддат ҳисобланади.

Лойиҳа доирасида республика ва унинг алоҳида ҳудудларининг табиий-иқтисодий потенциалини ягона умумдавлат, яхлит ва комлекс ҳисобга олишни, баҳолаш, шунингдек, давлат бошқаруви органлари, юридик ва жисмоний шахслар фаолияти учун зарур кадастрга оид ахборотлар билан оператив таъминлаш мақсадида кўпвазифали ахборот тизими яратилади.

Мазкур тизимни яратиш бўйича ўтказилган тендерда Жанубий Кореянинг ICT Technologies компанияси ғолиб бўлди. Мазкур йўналишдаги ишлар 2017 йилда якунланади.