Қозоғистон президенти Нурсултон Назарбоев Оқ Ўрдада асосий экспортчи компаниялар раҳбарлари билан йиғилиш ўтказди. Бу ҳақда “Казинформ” агентлиги хабар бермоқда.

“Биз мураккаб даврда яшамоқдамиз. Охирги йил давомида жаҳон иқтисодиётидаги вазиятнинг жиддий ёмонлашуви кузатилди. Бу ерда асосий экспортчиларимиз, кичик ва ўрта бизнес вакиллари ўтирибди. Инқироз барча йўналишларда бормоқда. У ҳам ривожланаётган, ҳам ривожланган давлатларни четда қолдирмади. Ундан ҳеч ким четда қолмади”, – деди у тадбиркорларга мурожаатида.

Шунингдек, давлат раҳбари жаҳонда нефть нархининг тушиши давом этаётганини эслатиб ўтди, бу эса Қозоғистон экспортининг муҳим қисмини ташкил этади. Металлар нархининг тушиши эса 2011 йилдан буён давом этмоқда.

“Асосий садво ҳамкорларимиз – Хитой ва Россиядаги ички вазият туфайли ушбу мамлакатларнинг бизнинг эскпорт маҳсулотларимизга бўлган талаби тушиб кетди”, – давом этди сўзида Назарбоев.
Шунингдек, у 2014 йилдан буён доллар бошқа барча валюталарга нисбатан мустаҳкамланиб бораётганини эслатиб ўтди.