Қозоғистоннинг Олма-Ота шаҳридаги кўплаб валюта айирбошлаш шохобчалари ёпиб қўйилди, дея хабар берди Tengrinews.kz.
Очиқ шохобчалар атрофи эса одамлар билан гавжум. Одамлар навбатга туриб тенгени алмаштирмоқда. Бироқ доллар ва евро йўқлиги сабабли олма-оталиклар рубль сотиб олишга киришган.

Валюта алмаштириш учун келган кишилар долларни эски баҳода сотиб олишни исташини, бироқ Америка валютаси ҳеч қаерда йўқлигини таъкидлашган. Кўпчилик кеча, 19 августда долларни 195-197 тенгедан сотиб олмаганидан афсусда эканини билдирган.

Эслатиб ўтамиз, Қозоғистон бугун, 20 августдан бошлаб эркин сузувчи валюталар тизимини жорий этди. Бу эса доллар баҳосини эндиликда мамлакат марказий банки эмас, балки бозор белгилашини кўрсатади. Бугун, 20 август куни KASEнинг эрталабки сессияси якунларига кўра, долларнинг ўртача баҳоси 255,26 тенгени ташкил этди.