2015 йил 13 августда Ўзбекистон меҳнат ва аҳолини ижтимоий муҳофаза қилиш вазирлигида вазир А.Абдуҳакимов ва Жанубий Кореянинг собиқ молия вазири Пак Же Юн бошчилигидаги Жанубий Кореянинг бир қатор университетлари профессорлари делегацияси ўртасида учрашув бўлиб ўтди.

Вазир меҳмонларга таълим муассасалари битирувчиларини иш билан таъминлаш бўйича Ўзбекистонда олиб борилаётган  ишлар ҳақида атрофлича айтиб ўтди. Вазир ҳар йили Ўзбекистонда 500 мингга яқин ўқувчи касб-ҳунар коллежини битириб, меҳнат бозорига киришини таъкидлаб ўтди. Ҳукумат томонидан уларни иш билан таъминлашнинг аниқ чоралари кўрилмоқда – корхоналар коллежларга бириктирилиб, ҳар бир битирувчи билан ишлаб чиқариш амалиётини ўташ ва келгусида уларни ишга олиш бўйича уч томонлама келишувлар тузилмоқда, коллеж битирувчилари учун бўш иш ўринлари ярмаркалари ташкил этилмоқда.   

Битирувчиларнинг иш билан банд қилишнинг яна бир самарали услуби уларга микрокредитлар ажратиш йўли билан уларни тадбиркорлик фаолиятига жалб қилиш бўлмоқда.

2015 йилнинг иккинчи ярмида Фарғона, Сирдарё, Тошкент, Навоий, Самарқанд, Бухоро вилоятларида, Тошкент шаҳри ва Қорақалпоғистонда коллеж битирувчиларини уларнинг ўз бизнесларини очишда қўллаб-қувватлаш йўли орқали тадбиркорлик фаолиятига жалб қилиш бўйича ўз самарадорлигини намоён қилган катта ишлар ўтказилди.