Қозоғистон президенти Нурсултон Назарбоев Оқ Ўрдада асосий экспортчи компаниялар раҳбарлари билан йиғилиш ўтказди. Бу ҳақда “Казинформ” агентлиги хабар бермоқда.
Ўз чиқишида давлат раҳбари озиқ-овқат маҳсулотлари, товар ва хизматлар нархини осмонга кўтаришга ҳаракат қиладиган бизнесменларни қаттиқ жазолашга ваъда берди.
“Бу жуда муҳим масала, – деди у. – Биз савдо билан шуғуланнаётганларни ва ҳокимларни огоҳлантирдик. Асосий маҳсулотлар нархлари ошмаслиги керак. Қозоғистонда ишлаб чиқарилади, шу ерда сотилади, демак, нархи ҳам ошмаслиги керак. Фойда кетидан қувадиганларни тутиб, қаттиқ жазолаймиз. Ҳукумат вазиятни назоратга олади”.
Шунингдек, у 2014 йилдан буён доллар бошқа барча валюталарга нисбатан мустаҳкамланиб бораётганини эслатиб ўтди.
Эслатиб ўтамиз, пайшанба куни Қозоғистон бош вазири Карим Масимов мамлакатда янги пул-кредит сиёсати амалга оширилишини эълон қилиб, бунинг асосида танга курсининг эркин шаклланишини белгилаб берди ва валюта коридорини бекор қилди. Бу баёнотдан сўнг Қозоғистон фонд биржасида танганинг долларга курси кескин тушиб кетиб, 255-259 тангагача борди.