Туркиянинг вице-чемпион жамоаси "Фенербахче" "Челси"нинг фахрий футболчиси Жон Террини ўз сафига қўшиб олишни истамоқда. Турклар 36 ёшли бу футболчи учун ўта қулай таклиф билан чиқишган.

"Спорт-Экспресс" нашри хабарига кўра, "Фенербахче" Терри Лондонни тарк этишга рози бўлса, у билан йилига 3,5 млн евролик маош тўлашни назарда тутадиган шартнома имзоламоқчи.

Жорий ёзги трансферлар вақтида "канарейкалар" жамоаси фаол ҳаракат қилмоқда. "Фенербахче" АПЛда узоқ вақт тўп сурган Робин ван Перси ҳамда Нанини ўз таркибига қўшиб олишга улгурган.

Террининг эса амалдаги шартномаси келгуси йилнинг ёзида ниҳоясига етади. Бу эса мавсум якунига етгач, у жамоани эркин агент сифатида тарк этишини англатади.

Моуриньо Террини АПЛнинг иккинчи турида "Манчестер Сити"га қарши ўйиннинг биринчи таймидан кейин алмаштириб ташлагани ҳам унинг кетиши ҳақидаги гап-сўзларга сабаб бўлмоқда.

Террига муносиб ўринбосар сифатида "Эвертон" футболчиси Жон Стоунз ҳисобланмоқда. Унга "аристократлар" 40 млн евролик таклиф билан чиқмоқчи.