WBO йўналиши бўйича жаҳон чемпиони, украиналик боксчи Василий Ломаченко кубалик Гильермо Ригондо билан баҳс бойлади. Айтилишича, 1 млн долларлик баҳс боксчилар Twitter’да ўзаро хабар алмашаётган чоғда бойланган.

17 август Ломаченко ўз микроблогида Ригондо билан жанг қилиш ниятини билдирди. Бунга жавобан кубалик спортчи 1 млн долларга гаров ўйнашни таклиф қилди. Ютқизган айнан шу миқдордаги пулни ғолибга бериши керак бўлади. Ломаченко шартга рози бўлди.
Боксчиларнинг промоутерлари ўртасидаги музокаралар бир неча ойдан буён давом этмоқда. Асосий муаммо жанг қайси вазн тоифасида ўтказилиши бўлиб турибди, негаки, Ломаченко ўрта енгил вазнда (57.15 кг гача), 34 ёшли Ригондо эса иккиламчи энг енгил вазнда (55.22 кг гача) жанг қилишади.

Ригондо ҳаваскор боксдаги энг кучли спортчилардан бири ҳисобланади. Ҳаваскор боксда у 475 учрашув ўтказиб, 12 марта мағлубиятга учраган, 2000 ва 2004 йиллардаги Олимпия ўйинларида ғолиб бўлган. Профессионал карьерасида эса 15та ғалаба қозониб, WBO ва WBA йўналишларида чемпионлик камарини қўлга киритган.
27 ёшли Ломаченко ҳам икки карра Олимпия ўйинлари ғолибидир (2008, 2012). Ҳаваскор боксда у 397 ўйин ўтказиб, бир мартагина мағлуб бўлган. Профессионал карьераси мобайнида Ломаченко 4 марта ғалаб қозонган, 1 марта енгилган. Майк Тайсон уни Шарқий Европанинг энг кучли боксчиси деб атаган эди.