Россия бадиий гимнастикаси федерацияси президенти Ирина Винер-Усмонова эркакларнинг бадиий гимнастикада пайдо бўлишини қўллаб-қувватлашини ҳамда бадиий гимнастикада аралаш чиқишлар пайдо бўлишини ёқлаб чиқишини айтди. 

Синхрон сузишда аралаш чиқишлар яқинда Қозонда бўлиб ўтган сув спорт турлари бўйича жаҳон чемпионатининг дастурига биринчи марта киритилди. 

“Агар аёллар боксда, футболда ва оғир атлетикада бўлса, нима учун эркаклар синхрон сузиш ёки бадиий гимнастикада пайдо бўла олмайдилар? Мен уларнинг пайдо бўлишини қўллаб-қувватлайман. Биз эркаклар гимнастикаси бўлишини жуда истаяпмиз, бироқ Бадиий гимнастика халқаро федерациясининг ҳозирги раҳбарияти уни ҳаттоки ноолимпия ўйини даражасида ҳам қабул қилишни истамаяпти”, деб айтди Винер-Усмонова журналистларга.

“Мен, шунингдек, бадиий гимнастикада аралаш жуфтликлар пайдо бўлиши тарафдориман. Ўғил болаларни жалб қилиш керак. Қизлардан сўранг. Эркакларсиз гимнастика уларнинг жонига теккан”, деб қўшимча қилди Винер-Усмонова.