Айни кунларда Тошкент вилоятида сув танқислиги муаммоси мавжуд эмас, лекин бундай ҳолат яқин истиқболда келиб чиқиши мумкин. Бу ҳақда Гидрометереология илмий-тадқиқот институти атроф муҳит ифлосланишини тадқиқ этиш бўлими катта илмий ходими Ирода Розиқова маълум қилди.

“Тошкент ҳудудида ҳали сув танқислиги сезилмайди, аммо бундай вазият келиб чиқиши мумкин, агар сувни тежашни ҳозир ўрганмасак, бу инқирозни тезлаштирган бўламиз”, – деди у “Новости Узбекистана” нашрига берган интервьюсида.

“Бу унчалик қийин эмас, – сўзида давом этди эксперт. – йўллар бўйидаги фавворачалар сонини камайтириш ёки ҳеч бўлмаса суғориш тугаши билан уларни ўчириш, пиёдалар йўлини ботқоққа айлантирмаслик... Бир газетада кўзим тушган эди, испанияликлар суғориш ишларида қайта ишланган сувдан фойдаланар экан, ошхонадан, ҳаммомдан чиқадиган...”.

Бундан ташқари, Розиқова қишлоқ хўжалигида сувдан фойдаланиш самарадорлигини ошириш мумкинлигини таъкидлаб ўтди: “Бизда ҳам айрим ақлли фермерлар ва ирригаторлар, асосан Фарғона водийсида, суғоришда бир сувни қайта-қайта ишлатишади. Улар томчилаб суғориш усули билан сувни қайта ишлаш тажрибалари ҳақида гапириб беришган эди. Ишлатилган сув тўпланади, тозаланади ва яна қўлланади – сув истеъмолининг ёпиқ тизими юзага келади”.