2015 йилнинг июль ойида Россияда 452,3 минг дона автомобиль сотилиб, 2014 йилнинг шу даврига нисбатан 18,7 фоизлик паст натижа қайд этилди. Ўтган 7 ой ичида эса мамлакат енгил автомобиллар бозори ҳажми 2,7 миллион донани ташкил этиб, 2014 йилга қараганда 22,6 фоиз кам автомобиль сотилган. Бу ҳақда “Автостат” таҳлил агентлиги хабар қилган.

Ўтган ойда 138,9 минг дона Lada (2014 йил июль ойига нисбатан 21,7 фоиз кам) сотилган. Топ-25га кирувчи моделлар ичида фақатгина Hyundai Solaris (+12,3 фоиз) савдосида ўсиш кузатилган. Бошқа моделлар савдоси эса 6,1 фоиз (Renault Logan)дан 34,1 фоиз (ВАЗ-2106)гача камайган.

Хориж моделлари ичида Toyota 49,8 минг дона машина билан (-21 фоиз) етакчилик қилаётган бўлса, Nissan 23,2 минг дона (-17,7 фоиз), Chevrolet 18,1 минг дона (-13,9 фоиз) дона маҳсулот сота олган. Энг кўп сотилган чет эл брендлари рўйхатида Ford Focus биринчи ўринни эгаллаган.

Эслатиб ўтамиз, 2015 йилнинг январь—июнь ойларида GM Uzbekistan АЖ ҚК Россияга 10 357 дона автомобиль сотган эди. Бу ўтган йилнинг шу даврига нисбатан 57 фоизга кам демакдир.