Корейс халқ армияси КХДР етакчиси Ким Чен Индан қуролли кучларни тактик босқинчилик учун тўлиқ жанговар тайёргарлик кўриш ҳақидаги буйруқни қабул қилиб олди, дея хабар бермоқда “Ёнхап”.

Бундан аввалроқ эса КХДР Жанубий Кореяга агарда қуролсизлантирилган ҳудудда ташвиқот кампаниясини тўхтатмаса, ҳарбий ҳаракатларни бошлаши ҳақида ультиматум жўнатган эди.

“Шимол агарда жануб Пхеьянга қарши психологик эшиттиришлар узатишни тўхтатмаса ва барча зарур ускуналарни пайшанба (20 август) 17:00дан бошлаб 48 соат ичида олиб ташламаса, ҳарбий ҳаракатларни бошлаш билан таҳдид солмоқда”, – дейилади Жанубий Корея вазирлиги хабарида.

Жануб ОАВларининг хабар қилишича, ультиматум КХДР Жанубий Корея ҳудудини ўққа тутганидан бир соат ўтиб эълон қилинган.

Эслатиб ўтамиз, 10 август куни Жанубий Корея 11 йил ичида илк бор қуролсизлантирилган ҳудудда ташвиқот олиб борилувчи овоз кучайтиргичлар ишини қайта бошлаган эди.

Бундай қарорга эса қуролсизлантирилган ҳудудда икки жануб аскари минага дуч келиб, жароҳат олганидан сўнг келинган эди. Сеул Пхеньянни қуролсизлантирилган ҳудудни миналаштирганликда айблади, ўз навбатида КХДР ушбу айбловларни рад этди.