Янги Зеландиянинг Мотутапу оролида қушларни отиш тақиқлаб қўйилди. Бунга овчилар томонидан хатолик туфайли йўқолиб кетиш хавфи остида турган бир неча ноёб қушларнинг отиб қўйилгани сабаб бўлган.

Бунгача маҳаллий овчилар фақатгина Окленд атрофида пукеко ёки султон тустовуқлари турига мансуб қушларни отиши мумкин эди.

Маълум қилинишича, овчилар бу қоидага риоя қилмаган ҳолда такахе турига мансуб, ранглари пукеконикига ўхшаш лекин ундан 2 баробар йирик бўлган қушларни овлашган.

Айни вақтда бутун дунё бўйлаб 300 донага яқин такахе қушлари сақланиб қолган.

Янги Зеландия ҳукумати бу воқеадан қайғуда эканини маълум қилган ва овчилардан ўта эҳтиёт бўлишни сўраган.