БМТ Бош котиби Пан Ги Мун Шимолий Корея ва Жанубий Кореяни минтақадаги вазиятнинг янада кескинлашишига олиб келиши мумкин бўлган хатти-ҳаракатлардан тийилишга чақирди. Бу ҳақда бош котиб девохонаси вакили Эри Канеко журналистларга маълум қилди.

“Бош котиб Корея яриморолида сиёсий тарангликнинг ўсиб бораётгани ҳақидаги хабарларни синчковлик билан кузатиб бормоқда. У томонларни вазиятни янада мураккаблаштирадиган ҳар қандай ҳаракатлардан қочишни ҳамда тарангликни пасайтиришга қаратилган суҳбатлашув ўтказишни бошлашга ҳамда тинчлик ва барқарорликка интилишга чақирди”, деб айтди Канеко.

Корея яриморолидаги вазиятнинг жиддий кескинлашиши 20 август куни Шимолий Корея ва Жанубий Корея қуролсизлантирилган ҳудуднинг ғарбий қисмида ўзаро отишмалар билан алмашгандан кейин юз берди. Жанубий Корея маълумотларига кўра, биринчи бўлиб Шимолий Корея отишма бошлаган. Отишмадан мақсад Сеул томонидан Пхеньянга қарши ташвиқот тадбирида ишлатилган овоз карнайларини нишонга олиш бўлган. Шимолий Корея эса ўз навбатида биринчи бўлиб отишма содир этганини инкор этмоқда.