АҚШ Давлат котиби Жон Керри президент Барак Обама номидан Украинани Мустақиллик куни билан икки кун барвақтроқ табриклади.

"Сизлар 24 август куни Мустақиллик кунини нишонлайсизлар. Президент Обама ва барча америкаликлар номидан мен украин халқига ўзимнинг энг яхши табрикларимни билдираман", дейилади АҚШ Давлат департаментининг расмий сайтида.

Керрининг қайд этишича, қийинчиликларга қарамасдан, украинлар мустақилликка эришиш йўлида, истибдод, бюрократия ва тажоввузкор қўшниларга қарши курашда ютуқларни қўлга киритишган.

У АҚШ ва Украина ўртасида дўстона муносабатларнинг янада ривожланишига умид билдириб, мамлакатдаги сиёсий муаммолар Минск келишувлари асосида ҳал қилинишига ишонч билдирган.