Ҳиндистоннинг жадал ривожланаётган бозори смартфон ишлаб чиқарувчи йирик компанияларни ўзига жалб этмоқда. Бу ерда Lenovo компанияси ўзининг Motorola бўлинмаси билан бирга иш бошлади.

Хитой компаниясининг смартфонлари Ченнай заводида Flextronics компанияси томонидан ишлаб чиқарилади. Компаниянинг Ҳиндистонда йиғиладиган биринчи смартфони Motorola Moto E смартфони бўлади. Ундан кейин Lenovo K3 Note фаблети ишлаб чиқарилади. Кейинги молиявий йилдан Motorola ва Lenovo ушбу заводда 6 млн дона смартфон ишлаб чиқаришни режалаштирмоқда.

Бундан бироз аввал Ҳиндистонда Xiaomi ҳам ўз смартфонларини ишлаб чиқаришни бошлаган эди. Яқинда компания Ҳиндистонда йиғилган илк смартфонини намойиш қилди. Бунинг учун Xiaomi компанияси Apple’нинг энг йирик ҳамкори Foxconn’ни жалб қилди. Компаниянинг Redmi 2 Prime смартфони Шри-Ситидаги заводда йиғилмоқда. Хабарларга қараганда, яна бир қатор ишлаб чиқарувчилар, жумладан, Oppo, ASUS, Gionee ва Huawei компаниялари ҳам Ҳиндистонда ўз ишлаб чиқаришини жойлаштирмоқчи. Мавжуд маълумотларга кўра, Microsoft компанияси Foxconn билан Ҳиндистонда Lumia сериясидаги баъзи моделларни ишлаб чиқариш бўйича суҳбат олиб борган.

Қайд этиш керакки, Lenovo’ни ҳинд бозорида янги ишлаб чиқарувчи дейиш нотўғри бўлади, чунки компания бундан бир неча йил аввал ҳинд заводларида компьютер ишлаб чиқаришни йўлга қўйган эди.