Оқ уй Ироқ ҳудудида "ИШИД"нинг иккинчи даражали одами Ҳожи Мутоз ўлдирилганини маълум қилди. Рейтер нашрида ёзилишича, у 18 август куни ҳаво ҳужуми натижасида ҳалок бўлган.

"Асл исми Фадхил Аҳмад ал-Хаёлий бўлган, Ҳожи Мутаз номи билан танилган бу одам 18 август куни АҚШ томонидан берилган ҳаво зарбаси орқали йўқ қилинган. У бу пайтда Ироқнинг Мосул шаҳри яқинидаги ҳудудда машинада кетаётган бўлган", деб маълум қилди Оқ уй қошидаги Миллий хавфсизлик кенгаши вакили Нед Прайс.

Унинг қўшимча қилишича, Мутазнинг ўлдирилиши, жангариларнинг келгусидаги ҳарбий ҳаракатларини қийинлаштиради.

Ҳожи Мутаз "ИШИД"нинг Ироқ ва Суриядаги қисмлари пул, қурол, портловчи моддалар ва техника билан таъминланиши, шунингдек ОАВ орқали тарғиботи учун масъул бўлган.