Нефть нархи, Ғарб санкциялари ҳамда давлат бошқарувининг носамарадорлиги Россияда инфляциядан бошқа иқтисодиётнинг барча муҳим кўрсаткичлари тушишига олиб келди, деб ёзмоқда Россиядаги статистика ва аҳоли ўртасида ўтказилган сўровномаларга иқтибос келтирган ҳолда Буюк Британиянинг The Economist нашри.

Россия иқтисодиётидаги чуқур пасайиш чорак бўйича Россия ялпи ички маҳсулотининг йиллик кўринишда 4,6 фоизга пасайишига олиб келди ва бу давлатнинг барча ижтимоий қатламларига таъсир кўрсатди, деб таъкидламоқда журнал.

Нефть нархининг пасайиши ҳамда рублнинг қадрсизланиши барча сегментларда савдоларнинг пасайишига олиб келди, хусусан автомобиль савдолари 1-чорак натижаларига кўра 36 фоиз тушиб кетган.

“Одамлар бундай пайтда қорнини тўйғазишни ўйлайди, бундай нарсалар уларни қизиқтирмайди”, деб айтди журналга Москвадаги дўконлардан бирининг эгаси Генрих Мхитарян.

Ярим йил натижаларига кўра, россияликларнинг даромадлари 3,1 фоизга тушиб кетган, чакана савдолар ҳажми 7 ойдан бери тушиб бормоқда.

Бундай иқтисодий шароитларда фақатгина нарх-наво ошмоқда ва ҳалитдан россияликларнинг оила бюджетини “ютиб юборяпти”. Бундай иқтисодий муаммолар ҳукуматни “аввалги Россиянинг буюклиги” ва уни қайтариш учун “бироз чидаб туриш кераклиги” ҳақидаги гапларни гапиришга мажбур қилмоқда.