Ўтган ҳафта Тошкент шаҳрига машинада марихуана моддасини олиб киришга ҳаракат қилган бир қанча шахслар тўхтатиб қолинди. Барча ҳолатларда хизмат итлари муҳим роль ўйнади, деб ёзади “Огоҳ” газетаси.

Айтилишича, Бектемир туманидаги Шарқ ЙПХ масканидан ўтиб кетаётган Lacetti автоулови шу ерда хизмат олиб бораётган ходимлар томонидан тўхтатилди. “Дори” лақабли хизмат ити ёрдамида текширилганида, машина салонида Олмазор туманида истиқомат қилувчи шахсга тегишли 1.17 гр марихуана борлиги аниқланди.

Худди шунингдек, Учтепа туманидаги Назарбек ЙПХ масканида Damas автомашинаси ичида 2 гр марихуана моддаси борлиги маълум бўлди.

Олмазор туманидаги Келес ЙПХ масканида бўлса Тошкент шаҳрига ҳаракатланиб келаётган Nexia автомашинаси тўхтатилиб, “Кайра” лақабли хизмат ити ёрдамида текширилганда, ҳайдовчининг ёнида 1.84 гр марихуана моддаси борлиги фош этилди.