Испаниянинг Андалузия автономидаги Кадис вилоятида жойлашган Требухена муниципалитетида бортида 2 киши бўлган хусусий самолёт қулаб тушди. Бу самолёт Севилья аэропортидан ҳавога кўтарилганидан кўп ўтмасдан учувчи ҳушини йўқотган. Бу ҳақда Europa Press агентлиги хабар берган.

Маълум қилинишича, учувчи ҳушини йўқотганидан кейин унинг рафиқаси бошқарувни қўлга олган. У телефон орқали танишига қўнғироқ қилиб, махсус хизматлар билан боғланган ва қандай ҳаракат қилиш бўйича кўрсатмалар олган.

Бу воқеа ҳақида маълумот олингач, самолёт ҳаракатини кузатиб бориш учун ҳавога вертолёт ва кичик самолёт чиқарилган. Улар ҳам аёлга ёрдам беришган.

Охир-оқибат самолёт муваффақиятсиз қўнишни амалга оширган. Самолёт Сан Пабло аэропорт яқинида қулаган. Натижада учувчи ҳалок бўлган, унинг рафиқаси эса жароҳатлар билан шифохонага етказилган.

Тахмин қилинишича, учувчи самолёт қулашидан аввалроқ жон берган.
Айни вақтда Севилья аэропорти вақтинчалик ёпиб қўйилган.