Жанубий Корея ва Шимолий Корея ўртасида вужудга келган можарони ҳал қилиш бўйича музокаралар 10 соатдан кўпроқ давом этгандан тўхтатилди ва 23 август куни давом эттириладиган бўлди, деб хабар бермоқда «Ренхап» ахборот агентлиги. Музокаралар давомида қандайдир келишувга эришилгани ҳақида ҳеч қандай маълумот мавжуд эмас.

Қайд этилишича, музокаралар маҳаллий вақт билан 15:00да (Тошкент вақти билан 11:00да) қайта бошланади.

Музокараларда Жанубий Корея томонидан президентнинг миллий хавфсизлик масалалари бўйича маслаҳатчиси Ким Гван Чжин ва бирлашиш ишлари бўйича вазир Хон Ен Пе, Шимолий Корея томондан эса Жанубий Корея ишлари бўйича юқори лавозимли амалдор Ким Ян Гон ва Корея халқ армияси сиёсий бошқаруви директори Хван Бен Со иштирок этадилар. 

Пхеньяннинг талаби аввалбошдан икки давлат чегарасида Жанубий Корея томонидан ўрнатилган овоз карнайларини олиб ташлаш ва Шимолий Кореяга қарши қаратилган ташвиқотни тўхтатишдан иборат эди. Жанубий Корея бу талабларни бажаришдан бош тортди ва ташвиқотни давом эттиришини айтди.