Ўтган жума, 21 август куни Амстердам – Париж йўналиши бўйлаб қатновчи “Талис” поездида содир бўлган отишмадан сўнг Бельгия ҳукумати темир йўл тармоқларида хавфсизликни кучайтириш бўйича чораларни амалга оширишга киришди, дея хабар берди Брюсселдаги "Суар" нашри.

Хабарда қайд этилишича, дам олиш кунлари (22-23 август) йўловчилар юклари устидан назорат кучайтирилиб, вокзалларда француз-бельгия патруллари сони кўпайтирилган.

Шунингдек, Бельгиядаги халқаро вокзал ва поездлар хавфсизлигини таъминлаш ишларига қўшимча равишда 54 нафар федерал полиция хизматчилари ҳам жалб этилган.

Эслатиб ўтамиз, 21 август куни Амстердамдан Париж шаҳрига кетаётган тезюрар поездда эркак киши содир этган отишма натижасида уч киши жароҳат олган эди. Жиноятчи йўловчилар томонидан қуролсизлантирилиб, ҳуқуқни муҳофаза қилиш органи ходимларига топширилган.