Исроилнинг меҳнат ихтилофлари бўйича суди шанба кунлари футбол ўйинлари ўтказишни тақиқлади. Бу ҳақда Исроил телевидениеси орқали хабар қилинди.
Суд қарори Исроил футбол уюшмасини 7 сентябрга қадар шанба кунлари ўйин ўтказишни тўхтатишга чақиради. Шу куни суднинг навбатдаги мажлиси бўлиб ўтади.

Яҳудийлик дини қонунларига кўра, шанба ҳафтанинг еттинчи куни бўлиб, дам олиш куни ҳисобланади. Шу боис бир гуруҳ футболчилар судга мурожаат қилиб, ўз касблари туфайли шанба кунлари ишлашга мажбур бўлаётганларидан арз қилишган эди.

“Шанба кунлари футбол ўйинлари ўтказиш жиноятдир, шу боис мен бу ўйинларни ўтказишга рухсат бера олмайман, - деди судья Ариэла Гильцер-Кац. – Айни пайтда мамлакатда шанба кунлари ишлаш тақиқланган. Исроил қонунчилигига биноан футболчилар шанба куни майдонга туша олмайди”.

Исроилда шанба кунлари ишлайдиган корхоналар бунга иқтисодиёт вазиридан махсус рухсатнома олиши керак. Айни пайтда бу лавозимни ультрадиний ортодоксал ШАС партияси раҳбари Арье Дери эгаллаб турибди. Шу боис футболчиларнинг ундан рухсатнома олиши эҳтимолдан узоқ деб ҳисобланмоқда.