Ўзбекистон Республикаси давлат мустақиллигининг 24 йиллигига бағишлаб ўтказилган «Энг улуғ, энг азиз» республика кўрик-танлови ғолибларини тақдирлаш маросими бўлиб ўтди. Бу ҳақда миллий агентликнинг ахборот хизмати маълум қилди.

Ушбу танлов Ўзбекистон Матбуот ва ахборот агентлиги, Журналистлар ижодий уюшмаси, «Тасвирий ойина» ижодий уюшмаси, Ёзувчилар уюшмаси, Миллий телерадиокомпания, «Ўзбеккино» миллий агентлиги, Бадиий академия, Электрон оммавий ахборот воситалари миллий ассоциацияси ҳамда Мустақил босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фонди томонидан анъанавий тарзда ўтказилиб келинмоқда.

Танловнинг кино санъати асарлари йўналишида режиссёрлик иши учун Рустам Саъдиевнинг «Сотқин» бадиий фильми 1-ўринга лойиқ деб топилди.

2-ўрин Муроджон Одиловнинг «Ўзбекистонликлар», «Орзулари ушалган одамлар», «Завол билмас умр» ҳужжатли фильмларига, 3-ўрин эса «Ота», «Новда» фильмларидаги операторлик иши учун Азизбек Арзиқуловга насиб этди.

Шунингдек, «Дилор, Дилор, дил ва ор» бадиий фильмидаги бош ролни ижро этгани учун актриса Шаҳло Темирова, «Қорақалпоқфильм» киностудияси оператори – «Болалар кулган бахтли эл», «Қоратов сирлари», «Устюрт – хазиналар маскани» ҳужжатли фильмларидаги операторлик иши учун Асенбай Асқаров, фахрий режиссёр – Кексаларни эъзозлаш йили муносабати билан ҳамда кўп йиллар давомида маънавий-маърифий, тарихий мавзуларда тайёрлаган туркум ҳужжатли фильмлари учун Саидботир Аҳмадхўжаевга рағбатлантирувчи мукофотлар топширилди.